LONTARA ANA’ LOLO

BISMILLAHI RAHAMANI RAHIM

ALHAMDULILLAHI RABBIL ALAMIN

SININNA APPOJI NAPPUNNAI’E PUANG ALLAH TA’ALA, PUANGNA SININNA ALANGNGE, PUANG JELLOKENGGI LAO RI GAU PATUJUI’E MAPPARINGERRANG LAO RI GAU PASALAE

Usabbi majepu ’degaga Puang risompa tonget-tongeng sangadinna Puang ALLAHU TA’ALA

Usabbi toi majeppu nabi MUHAMMAD suro mateppena ALLAH TA’ALA nakkamase lao ri atanna enrengnge ri sahaba’na ekkua topa atanna mateppee.

IYYANE PANNESSAINGNGI

BICARANNA ANA’ LOLOE RIWETTU MAELO’NA MESSU POLE RIBABAUNA INDO’NA.

Makkedai Puang Allahu ta’ala lao ri Malaeka Jibriilu, ”O, Jibriilu, suroni ana loloe messu”.

Makkedai Jibriilu lao ri ana loloe : ”Essu’no naelorenni Puang Allahu Ta’ala messu.

Makkedai ana loloe:) de’ umaelo messurenngi nareko de’ uwissengngi uwessurengnge.

Makkedai Puang Allahu Ta’ala: Assuno warekko Sipa’

Makkedai ana loloe: Iyya pega Sipa’ maelo tawerekka Puang?

Makkedai Puang Allahu Ta’ala:

Sipa’ Engka KU Upancajiko tubuh

Sipa’ Warekkeng KU Upancajiko Ati

Sipa’ ArajakKU Upancajiko Nyawa

Sipa’ TuoKU Upancajiko Rahasia

Makkedai ana loloe:) de’ umaelo messurengngi nareko iyya mitu!

Makkedai Puang Allahu Ta’ala: Magi mutea mesurengngi ana lolo?

Makkedai ana loloe: Iyyaro saba’na ute’a apa’ anu riparape’mi, narekko mualani matu parape’MU magana, iyya?

Makkedai Puang Allahu Ta’ala: Tongetto adammu ana’ lolo.

Makkedai Puang Allahu Ta’ala: Essu’no warekko Tajang

Makkedai ana loloe: tajang aga maelo muarekka Puang?

Makkedai Puang Allah ta’ala:

Narekko engka Tajang messu pole ri possimu, tettong mabbatang kaluku siterru langi pitus susungnge, tana pitul lapie, muitani alemu mappake mapute rilalenna tajangnge mappake makudara, mangollii lise’na tajangnge iyya'natu.

Makkedai ana loloe: De; umaelo messurengngi puang!

Makkedai Puang Allahu Ta’ala: Magi mutea mesurengngi ana lolo?

Makkedai ana loloe: Iyyaro utea nasaba nawinrui bellisi (Iblis)

Dua nawinru Bellisi, iyanaritu: ripuadaE sibawa na itaE mata kasara. Dua to, de’ nawinrui Bellisi, iyyanaritu: de’ nari pau de’to naitai mata ulutta iyarega mata kassara.

Makkedai Puang Allahu Ta’ala: Tongetto adammu ana’ lolo.

Makkedai Puang Allah Ta’ala: Essu’no warekko Tajang. Narekko engka Tajang malotong, mapute, maridi, Makudara, Aja’ sana muacceriwi sangadinna engkai pada-padammu. Narekko nabbokorino, Accue’no.

Makkedai ana loloe: De’ umaelo maccueriwi!

Makkedai Puang Allah Ta’ala: magi mutea maccueriwi?

Makkedai ana loloe: narekko makkoitu ada-adam MU Puang, aja’na usompaki. Nasaba sitengnga pada-padakku, ripancaji. Apa pada-pada mutoi!

Makkedai Puang Allahu Ta’ala: Tongetto adammu ana’ lolo.

Makkedai Puang Allah ta’ala: Essuno warekko Tajang.

Makkedai ana loloe: Kegasi Tajang maelo muwerekka Puang?

Makkedai Puang Allah Ta’ala: Narekko engka Tajang messu pole ri alinromu eppa-i mattettongeng BUDUUH, QUDDUUS, SUBBUUH, BADI”U; iyyanaritu muassolangi lao ri ita.

Makkedai ana loloe: De’ umaelo messurengngi Puang!

Makkedai Puang Allah Ta’ala: Magi mutea messurengngi ana lolo?

Makkedai ana loloe: Iyyaro utea messurengngi apa de’ nawedding engka Tajang pole ri alinroku eppa mattettongeng narekko de apoleanna?

Makkedai puang Allah Taala:

Siddi pole ri Iyya

Siddi pole ri nabi Muhammad

Siddi pole ri malaeka’e

Siddi pole ri Tauwe

Makkedai ana loloe: Iyyaro ute nasaba Iyya mappau, muitaka. Naiyya Idi mappau de uwitaki, na de uwissengngi maccoeriki narekko de uwitaki.

Makkedaipuang Allahu ta’ala: Tongeng to adamu ana lolo.

Makkedai Puang Allah ta’ala: Essuno warekko Sadda

Makkedai Ana loloe: Sadda aga maelo muarengnga Pauang?

Makkedaipuang Allah Ta’ala:

Narekko engka Sadda makkedai ”A” issengngi Puangmu

Narekko engka Sadda makkedai ”I” issengngi Alemu

Narekko engka Sadda makekdai ”U” issesngngi Nabimmu

Makkedai Ana loloe: de’ umaelo essurengngi Puang!

Makkedai Puang Allah Ta’ala: Magi mutea messurengngi ana lolo?

Makkedai Ana loloe: Iyyaro u tea nasaba SADDAMI, narekko Mualani matu SADDAMMU magana, Iyya?

Makkedai Puang Allah Ta’ala: Tongeng to adamu ana lolo

Makkedai Puang Allah Ta’ala: Assuno warekko SARE’A, TAREKA’, HAKEKA’, MA’RIFA’E

Makkedai Ana Loloe: Kega sarea,Tareka’, hakeka’, ma’rifae maelo Muarengga puang?

Makkedai Puang Allhu Taala:

Na iyya sarea’e Tubummu

Na iyya tareka’e Atimmu

Na iyya Hakekaa’e Nyawamu

Na iyya ma’rifae Rahasiamu

Makkedai ana loloe:

De’ umaelo messurengngi Puang. narekko iyyamiro Eppa-E wisseng apolenna.

Naiyya Sarea’e pole ri tanae

Naiyya tareka’e pole ri uwae

Naiyya hakeka’e pole ri Angingnge

Naiyya ma’rifae pole Api-e

De’ umaelo messurengngi nareko iyyamiro Eppa-e Puang

Makkedai Puang Allahu ta’ala: Tongengto adammu ana lolo. ”Pusana’tu ri adammu

Makkedai paimeng Ana Loloe:

Tarona Puang mappau-pau, narekko rape’ni ri akkaletta situru’ni, narekko tessituru’ki ancuruka paimeng.

Makkedai Puang Allahu ta’ala: narekko situruuki, situru’ni.

Makkedai ana loloe; Maeloka messu mapada-padapi’

Makkedai puang Allahu ta’ala: magi muelo mewaka pada-pada, narekko pada-padani? De’na Puang, de’ tona ata, de’ tona passessa.

Makkedai na loloe: Narekko musessaka, alemu musessa..

Makkedai Puang Allahu Ta’ala: Madecenni, na eki ya majjanciki?

Makkedai Ana loloeB: Pekkoga bateta majjanci?

Makkedai Puang Allahu Ta’ Ala:

Narekkomessuko, SappaaKa. Isseng toi arewekenna tubummu riammemengenna. Narekko mulolongengNGA’, uwunoko. Narekko uwonoko, Utokkokko. Narekko Utokkokko, AleKU Utokkongekko. Narekko temmulolongekKa, massarang nittu. Rewe’ kotu ri Eppa-e rupanna; ritanae, ri uwae, ri angingnge, ri apie. Mancaji kolo-kolo kotu matu narekko mateko.

Makkedai ana loloe: De’ pa umaelo messurengngi nasaba de’pa uwitaki lahere.

Laherenni Allahu Ta’ala sitetongeng Ana loloe.

Makkedai puang Allahu ta’ala: Itana muessuu lahere uwallirungiko, narekko mulolongengNGA iko tosi mallinrung ri Iyya, Iyya tosi lahere. Pada-pada ni’tu, naikiya atae ata mutoiha, naiyya Puangnge, Puang mutoiha. Engka topa ada makkeda makunie rapanna.